കോട്ടയം: അന്തരിച്ച സിസ്റ്റര് ആന് ഗൊരേത്തി കുന്നശേരി (89) വിദ്യാഭ്യാസ ആതുരമേഖലകളിലെ സജീവ സാന്നിധ്യമായിരുന്നു.
മോനിപ്പള്ളി എംയുഎം ആശുപത്രിയുടെ അഡ്മിനിസ്ട്രേറ്റര് എന്ന നിലയില് ആതുര സേവന രംഗത്തും സജീവമായിരുന്ന സിസ്റ്റര് ആന് ഗൊരേത്തി കടുത്തുരുത്തി, കൈപ്പുഴ, നട്ടാശേരി സ്കൂളുകളില് അധ്യാപികയായി നൂറുകണക്കിനു വിദ്യാര്ഥികള്ക്ക് അറിവിന്റെ അക്ഷരങ്ങള് പകര്ന്നു നല്കി.
കോട്ടയം അതിരൂപതയിലെ സെന്റ് ജോസഫ്സ് സന്യാസിനീ സമൂഹാംഗമായ സിസ്റ്റര് ആന്ഗൊരേത്തി, ആര്ച്ച്ബിഷപ് മാര് കുര്യാക്കോസ് കുന്നശേരിയുടെ സഹോദരിയാണ്. സെന്റ് ജോസഫ്സ് സന്യാസിനി സമൂഹത്തിന്റെ സുപ്പീരിയര് ജനറല്, ജനറല് കൗണ്സിലര്, നോവിസ് മിസ്ട്രസ്, സുപ്പീരിയര് എന്നീ നിലകളില് സ്തുത്യര്ഹ സേവനമാണ് നടത്തിയത്. സിസ്റ്റര് ആനിന്റെ ശിക്ഷണത്തില് പഠിച്ചുവളര്ന്നവര് ഇന്ന് ഉന്നതനിലകളില് ശോഭിക്കുന്നുണ്ട്.
തെള്ളകം മദ്നഹാ തിയോളജിക്കല് ഇന്സ്റ്റിറ്റ്യൂട്ട് പ്രിന്സിപ്പലായും കടുത്തുരുത്തി, കൈപ്പുഴ, നട്ടാശേരി, കോട്ടയം, പാഴുത്തുരുത്ത്, മോനിപ്പള്ളി, കാരിത്താസ് എന്നീ മഠങ്ങളിലും സ്വിറ്റ്സര്ലന്ഡിലും സിസ്റ്റര് ആന് ശുശ്രൂഷ ചെയ്തിട്ടുണ്ട്. കടുത്തുരുത്തി കുന്നശേരി പരേതരായ ജോസഫ്-അന്നമ്മ ദന്പതികളുടെ മകളാണ്. ഡോ. ജോസഫൈന്, സാവിയോ, ആന്സി വെട്ടത്തുകണ്ടത്തില്, പരേതരായ തങ്കമ്മ ഏബ്രഹാം, സിസ്റ്റര് പയസ്, കെ.ജെ. ജോണ് എന്നിവര് മറ്റു സഹോദരങ്ങളാണ്.
സിസ്റ്റര് ആന് ഗൊരേത്തിയുടെ സംസ്കാരം ഇന്നു രാവിലെ 10ന് തെള്ളകം 101 കവലയിലുള്ള അനുഗ്രഹമഠം ചാപ്പലില് ശുശ്രൂഷയ്ക്കുശേഷം മഠം വക സെമിത്തേരിയില് നടക്കും.
E-paper LOGIN
LOGIN
